人生有幾多個十六年？
今日嚟到一間開業16年既居酒屋，佢既門口唔算突出，但內裡富有傳統日式餐廳風味🇯🇵眼見有好多熟客幫襯，係一間富有人情味既餐廳👍
-
首先上嚟前菜 魷魚軟骨沙律，細細一盤先俾味蕾準備一下嚟緊既小衝擊😏 之後係兩個小食，分別係蟹子魷魚及麵豉青瓜，前者魷魚新鮮有嚼勁，配上蟹子令魷魚更為爽口👍後者麵豉搭配青瓜新組合，本人係第一次食，青瓜係一樣較淡味既食物，配上濃味既麵豉，相得益彰好鬼夾喎！
-
接著既係 特上刺身拼盤，大大盤好豐富😍🤗 有海膽、吞拿魚、八爪魚、牡丹蝦、帆立貝、油甘魚、活赤貝及三文魚籽🤤 齋睇已經流哂口水，一大板既海膽，味道鮮甜，搭上紫菜食入口即溶💕 帆立貝係厚切非常新鮮，食完兩片好想再encore！活赤貝係我近來既至愛，哩度嘅都好出色，咬落勁爽口富有彈性，滲有微微鮮甜味😋😍 三文魚籽可以一大羹咁真係好爽😚🤗
-
跟住要講講兩款天婦羅，包括粟米天婦羅及舞茸天婦羅，粟米天婦羅出面特別少有，店長話製作較為煩複同功夫多，首先將粟米蒸熟，拎去切片再炸，估唔到炸完仲有咁多水份鎖住，粟米肉汁仍然保留👍舞茸炸完好脆口，好大舊夠哂滿足。
-
熱食方面，食左一個照燒無骨鮮雞腿🍗，好少地方食材用上新鮮肉，抵讚👍 新鮮雞脾肉充滿肉汁，肉質富有彈性，平時食開嗰啲雪藏雞脾絕對無得比！另外仲試左個自家製咖哩烏冬，個咖哩汁係餐廳自己調製，係較濃味既口味，辣度算高，配烏冬確係幾惹味！
-
📍沃川自家料理
尖沙咀麽地道75號南洋中心UG5-8號舖
Search